Uttanríkis- og vinnumálaráðið hevur lagt til hoyringar eitt uppskot um broytingar í kunngerð um avmarkandi tiltøk móti Russlandi. Hetta verður gjørt í sambandi við støðuna í Ukraina.
Uppskotið broytir skjalið við vørum, sum ikki longur kunnu seljast, flytast ella útflytast til Russlands.
Skjalið umfatar nýggjar vørur so sum oljur frá koltjøru, rør og slangur av plasti, og prentimaskinur. Á sama hátt eru fleiri vørur, sum til dømis og aluminiumhydroxid, tiknar av listanum.
Nýggja uppskotið bannar eisini innflutningi av vørum úr Russlandi, sum til dømis helium.
Umframt hetta verða upplýsingarkrøvini fyri umsóknir um undantak frá avmarkandi tiltøkum nágreinað, og reglurnar um revsing tillagaðar.
Nýggju avmarkingarnar verða eisini sett á ávís farma- og tangaskip úr Russlandi fyri at tryggja, at reglurnar verða hildnar. Hesi nýggju tiltøkini verða mett at fara at hava ávirkan á fleiri økjum.
Uppskotið er til ummælis fram til 25. februar 2025.
Deil á Facebook
