Fiskivinnu- og samferðslumálaráðið hevur sent eitt uppskot um broytingar í sjófeingislógina til hoyringar. Málið er at tryggja vinnuni tryggar karmar og gjøgnumskygdar reglur, samstundis sum føroyska samfelagið fær sum mest burturúr havtilfeinginum.
– Hetta eru neyðugar broytingar, nú lógin hevur virkað í nøkur ár. Endamálið er m.a. at tryggja vinnuni tryggar karmar og gjøgnumskygdar og rættvísar reglur at virka undir. Umframt at tryggja, at føroyska samfelagið fær sum mest burturúr, og hevur fult ræði á livandi tilfeinginum, sum vit føroyingar eiga í sjónum, sigur Dennis Holm, landsstýrismaður í fiskivinnumálum á heimasíðuni hjá ráðnum.
Ein týðandi broyting er herðingin av reglum um útlendskan ognarskap. Útlendingar kunnu eiga upp til 25% í feløgum við veiðirættindum fram til 2032, tá allur útlendskur ognarskapur skal vera á føroyskum hondum. Í hesum tíðarskeiðinum kunnu verandi útlendingar ikki økja sín ognarlut ella avgerðarrætt.
Fiskirættindi skulu miðsavnast á færri hondum fyri at tryggja ein breiðari eigaraskara. Nýggju reglurnar seta markið fyri veiðirættindi niður í 15% í øllum bólkum, undantikið Barentshavið, sum verður lækkað niður í 25%. Hesi mørk verða galdandi frameftir, og verandi rættindi verða varðveitt.
Kravið um landing í Føroyum verður eisini broytt, soleiðis at uppsjóvarskip kunnu landa helvtina av veiðuni av svartkjafti, makreli og norðhavssild uttanlands.
Allir loyvishavarar skulu virka undir somu treytum, og kvotur verða settar við støði í heildarkvotuni. Nýggj skipan verður sett í verk, sum loyvir teimum við lutfalsliga lítlum kvotum at fáa atgongd til økt tilfeingi, um heildarkvotan fer upp um eitt ásett mark.
Freistin fyri viðmerkingum er 20. januar 2025. Lógaruppskotið kann lesast á heimasíðuni hjá ráðnum.
Deil á Facebook
