Gidsel og Reistad eru heimsins bestu hondbóltsspælarar annað árið á rað

Liðfelagin hjá Hákuni West av Teigum í Füchse Berlin, danski hondbóltsleikarin Mathias Gidsel, er fyri aðru ferð á rað valdur til heimsins besta hondbóltsspælara. Tað kunngjørdi altjóða hondbóltssamgongan, IHF, í dag.

26 ára gammli Gidsel hevur við sínum serstaka kvika spælistíli verið ein av høvðusorsøkunum til, at danska manslandsliðið í 2024 vann EM-silvur og OL-gull. Haraftrat var hann í OL útnevndur til bæði toppskjútta og besta spælara í kappingini, ofta róptur “MVP”.

Gidsel hevur eisini gjørt stóran mun í Füchse Berlin, sum hevur staðið seg so væl, at liðið er komið í Champions League.

Hetta er eisini fimta ferð á rað, at ein dani verður valdur sum heimsins besti hondbóltsspælari hjá monnum.

Hjá kvinnum er norska Henny Reistad eisini heimsins besti hondbóltsleikari aðru ferð á rað. Reistad fekk stóran part av atkvøðunum bæði frá fjepparum og venjarum. Hon var lykilspælari hjá Noregi, sum vann OL- og EM-gull, og hon var toppskjútti í Champions League við danska felagnum Team Esbjerg.

Renārs Uščins úr Týsklandi og Petra Simon úr Ungarn vunnu heiðrarnar sum bestu ungu spælarar.