Hvalbiar trolararnir Hamranes og Breiðanes treingja til eina yvirháling og skulu á beding í Thyborøn, upplýsir Mikkjal Hammer, reiðari. Talan verður sannlíkt um eitt avbrot í driftini upp á fleiri mánaðir, sum eisini kann raka fiskavirkið í Hvalba, TG Fish.
Upprunaliga varð umhugsað at byggja nýggjar trolarar fyri at skifta út teir meir enn 30 ára gomlu partrolararnar, men kostnaðurin á verkætlanini – einar 100 milliónir fyri hvønn trolara – varð mettur at vera ov høgur.
“Vit hava roynt tríggjar ferðir tey seinastu átta árini at fáa eina búskaparliga samanhangandi verkætlan við nýbygningum,” segði Mikkjal Hammer við FM1. “Herfyri komu vit so til ta niðurstøðu at frægasta loysn fyri nú er at høvuðsumvæla Hamranes og Breiðanes so báðir fáa nýggja maskinu og nýtt spæl.”
Besta tilboð kom frá Thyborøn í Júllandi.
“Vit heintaðu inn tilboð frá tveimum føroyskum veitarum og fleiri útlendskum,” segði reiðarin. “Tað vísti seg at Thyborøn hevði tað besta tilboðið, so tað bleiv avgjørt at lata bátarnar fara á beding har.”
Umvælingarnar á skipasmiðju í Thyborøn byrja eftir ætlan í fyrsta ársfjórðingi í 2025. Antin fara bæði skipini í umvæling samstundis ella fer tað eina at fiska meðan hitt er á beding. Um so er má avloysaraskip finnast til partrolingina tað tíðarskeiðið.
Saman við uppsjóvartrolaranum Arctic Voyager og djúpvatnstrolaranum Steintór, hoyra Hamranes og Breiðanes til samtakið Steintór Holding, ið eisini umfatar fiskavirkið TG Fish í Hvalba, sum verður rikið í samstarvi við Delta Seafood.
Framleiðslan er serliga upsi, sum verður skorin til portiónir og frystur. Eisini verður eitt sindur av svartkalva skráskorið og fryst. Tað mesta av framleiðsluni verður útflutt til europeiska meginlandið.
Sambært Mikkjal Hammer er fyri tíðina heldur lítið av rávøru til virkið.
“Vit vóna so at umvælingarnar av Hamranes og Breiðanes kunnu bøta um fiskiskapin so mikið at vit koma upp á tey 5.000 tonsini um árið sum skulu til fyri at hesir bátarnir og virkið skulu standa seg.”
Eini 60 fólk arbeiða vanliga á virkinum í Hvalba. Tó hevur arbeiðið verið heldur óstøðugt síðan verkfallið fyrr í ár.
Tað er væl kent at fólk í vinnuni í longri tíð hava funnist at vánaligum livikorum fyri partrolarar og djúpvatnstrolarar í Føroyum, og Mikkjal Hammer er einki undantak í so máta.
“Tey sum varða av fiskivinnustýringini áttu at gjørt meira við at fingið tað smidligt og arbeiðsligt fyri hesa vinnu,” viðmerkti hann. “Ein roynd varð vist gjørd við at lata djúpvatnstrolarar fiska við dupultum troli, men har hoyrdist einki aftur, sjálvt um tað hevði kunnað gjørt góðan mun fyri teir trolararnar uttan at fiskastovnarnir høvdu verðið troyttir harðari av tí. Og við tekniskum reguleringum vísir tað seg at vit hava verri treytir enn onnur, eitt nú tá tað kemur til meskavídd – har fiska vit av sama stovni sum hetlendingar og skotar fiska av beint við markið, og teir fáa meira tí teir kunnu brúka eitt sindur minni meskar.”
Deil á Facebook
