Høgni Hoydal, landstýrismaður í uttanríkis- og vinnumálum, hevur svarað fyrispurningi frá Bárði á Lakjuni, løgtingsmanni. Hann spurdi, hví skip, sum eru eldri enn 20 ár, ikki kunnu skrásetast í Føroysku Altjóða Skipaskránni (FAS), og um tað er trupult at flyta skip frá danska DIS-skipaskránni til FAS.
Høgni Hoydal svarar, at í 2010 var arbeitt við at fáa føroyska flaggið frá gráa til hvíta lista hjá Paris MoU. Hetta kravdi broytingar í FAS-lógini fyri at bøta um flotan. Eitt av hesum krøvunum var, at Sjóvinnustýrið fekk heimild til at nokta eldri skipum upptøku í FAS. Tó kann Sjóvinnustýrið, undir serligum atlitum, loyva eldri skipum at verða skrásett.
Eldri skip eru ofta í verri tekniskum standi enn nýggj skip og verða tí oftari afturhildin til eftirlitsvitjanir í fremmandum havnum. Av tí at FAS hevur færri skip enn til dømis danska DIS-skipaskráin, telur hvørt afturhald nógv í uppgerðunum hjá Paris MoU. DIS tolir nógv fleiri afturhald, tí tað hevur 700 skip skrásett, meðan FAS bert hevur 77.
Tillagingar til lóggávuna fyri FAS verða tí gjørd við varsemi fyri at tryggja, at FAS ikki missir plássið á hvíta listanum hjá Paris MoU. Løgtingið fer at viðgera møguligar broytingar í lóggávuni, fyri at tryggja at føroyska skipaskráin framhaldandi verður sterk og álítandi.
Deil á Facebook
