Fjølrit hevur saman við sínum systurfeløgum í Íslandi, Danmark, Svøríki, Norra og Finnlandi skrivað eina felags yvirlýsing um vitlíki.
Feløgini eru:
- Fjølrit úr Føroyum
- Fjölís úr Íslandi
- Tekst & Node úr Danmark
- Bonus úr Svøríki
- Kopinor úr Norra
- Kopiosto úr Finnlandi
Tey umboða rættindahavarar, sum eiga tekstir, myndir og nótar, sum verður brúkt til at menna vitlíki.
Í yvirlýsingini vísa tey á, hvussu generativt vitlíki kann brúkast á ein ábyrgdarfullan hátt, uttan at bróta upphavsrættin.
Tey leggja fram tríggjar meginreglur:
- Fyrst og fremst gjøgnumskygni, har fyritøkur vísa, hvat tilfari verður brúkt.
- Síðan loyvi, har rættindahavarar skulu geva samtykki til nýtsluna.
- Og at enda rættvíst viðurlag: Skapandi fólk skulu fáa gjald fyri sítt tilfar.
Í yvirlýsingini stendur greitt: Virðing fyri rættindum hjá skapandi fólkum er ein skylda hjá øllum, og Vitlíkis-fyritøkur eru einki undantak.
Feløgini mæla til, at vitlíkis-fyritøkur gera avtalu við felagsskapir, sum umboða rættindahavarar í landinum, har nýtslan av vitlíki fer fram.
Hetta skal tryggja, at vitlíki kann mennast, uttan at skapanargleðin og rættindini hjá fólki verða sett til síðis.
Frá vinstru á myndini: Guðbjörg Benjamínsdóttir (Fjölís, Ísland), Arnbjørn Ólavsson Dalsgarð (Fjølrit, Føroyar), Valtteri Niiranen (Kopiosto, Finnland), Hege Munch Gundersen (Kopinor, Norra), Jørgen Karlstrøm (Bonus, Svøríki), Anders Kristian Rasch (Tekst & Node, Danmark)
Deil á Facebook
