2024 hjá Tjóðsavninum var merkt av soppavøstri í høvuðsgoymsluni í Brekkutúni í Hoyvík.
Ein álvarsligur soppatilburður í høvuðsgoymsluni kravdi, at gripirnir vórðu reinsaðir og fluttir í aðra goymslu. Orsøkin var broyting í inniluftini, sum kom av uttandura umvælingum. Hetta skapti góðar umstøður fyri soppavøkstri, og tí mátti savnið taka stig til at verja mentanararvinin.
Eftir ráðføring við serfrøðingar og fígging frá Løgtinginum varð farið undir eina verkætlan at bjarga gripunum. Arbeiðið byrjaði í september, og samstundis varð farið undir at fyrireika eina nýggja og tíðarhóskandi goymslu saman við Landsverki.
Hóast trupulleikarnar í goymsluni, var framsýningin ikki rakt, og vanliga virksemið kundi halda fram. Ársritið nevnir eisini, at savnið hevði vitjan av føroyskum og bretskum granskarum í London, har gamalt tilfar frá skipinum “Anne Marie” kom undan kavi. Hetta gevur nýggja vitan um søguligar hendingar millum Føroyar og Bretland.
Á náttúruøkinum var nógv virksemi. Verkætlanin Lendisbati skipaði fyri ráðstevnu og arbeiði í fleiri hagapørtum, og nýggj plantu- og djórasløg vórðu skrásett. Koltursætlanin fekk endaliga fígging og kom í gongd við verkætlanaruppskot í apríl.
Tjóðsavnið skipaði eisini fyri fleiri almennum tiltøkum, hóast serligar umstøður. Tiltøk vóru á kvinnustríðsdegnum, í heystfrítíðini og í jólamánaðinum. Vitjanartølini vuksu, og nógv fólk og skúlanæmingar nýttu framsýningarnar og skúlatænastuna.
Deil á Facebook
