HB slapp við hvøkkinum móti B68

Betrideildin Menn:
HB – B68 3-2 (3-2)

Landskappingin byrjaði við buldur og brak, og tað var undirhald fyri allar pengarnar í fyrra hálvleiki, tá ið HB og B68 spældu ársins fyrsta dyst í Betrideildini í 2025.

Ári Mohr Jónsson legði HB fram um longu eftir fýra minuttir, og hóast B68 hevði nógv spæl, so var tað Sammy Skytte, sum legði HB fram um 2-0, tá ið 25 minuttir vóru spældir. Tórur Thomsen í málinum sá ikki gott út, tá ið flata skoti frá Skytte fóru undir hann

HB sá út til at hava tamarhald á dystinum, tá ið Leivur Guttesen legði HB fram um 3-0, tá ið 38 minuttir vóru spældir. Men B68, sum vildi tað øðrvísi, og tá ið farið var til hálvleiks, høvdu Hanus Højgaard og Sebastian Lau Nielsen minkað niður í 3-2.

Í seinna hálvleiki kom einki mál. HB vísti als ikki nakað, sum minti um eitt lið, sum ætlar at spæla í oddinum, og hevði í heila tikið trupult við at hava nakað samanhangandi spæl.

B68 vísti hinvegin góðar taktir. Teir stríddust manniliga, og spældu væl heilt fram til brotsteigin hjá HB. Tað gjørdist tó sjáldan veruliga vandamikið frammanfyri HB-málið. Tann vandamiklasta støðan var, tá ið málverjin hjá HB, Reinis Reinholds, misti bóltin, tá ið hann skuldi sparka hann burtur frá málinum.

HB slapp við hvøkkinum. Trý stig eru trý stig, men tað er lítið at ivast í, at okkurt má gerast betri, um HB skal liva upp til tað, sum væntað og kravt verður av teimum.

B68 kann hinvegin vera nøgt við spælið og stríðsviljan, men sum so ofta seinnu árini, so fekk B68 heldur ikki tey stigini burtur úr í dag, sum teir helst høvdu uppiborið.