Queen Mary 2, Queen Elizabeth, Queen Victoria og nú er Queen Anne komið í flotan hjá Cunard Lines sum tað nýggjasta reikferðaskipið hjá felagnum, sum fer sín fyrsta almenna túr í næsta mánað.
Skiparið á Queen Anne er Inger Klein Thorhauge úr Vestmanna, sum hevur brúkt nakað av tíð at venja seg við tey mongu nýggju tólini á brúnni.
Hon sigur, at tað er ein stórur heiður, at sleppa at føra nýggja skipið.
– At standa við róðrið á nýggjasta skipinum hjá Cunard (felagið, ið eigur skipið, jour.) og føra felagið inn í eitt nýtt tíðarskeið er mær ein stórur heiður. Hetta er hæddarpunktið á mínari yrkisleið, og eg eri sera errin um at vera partur av hesum nýggja kapitli hjá felagnum, sigur Inger Klein Thorhauge, skipari á Queen Anne, við netmiðilin Crew Center.
Inger fer at hava eina manning upp á 1.225 undir sær umborð marglætis ferðamannaskipinum Queen Anne, sum tekur 3.000 ferðafólk. Skipið er er 322,5 metrar langt og 36 metrar breitt.
Hon hevur áður verið skipari á øðrum skipum hjá felagnum, millum annað á Queen Victoria og seinni eisini á Queen Elizabeth.
Skipið fer at sigla í Miðjarahavinum og í Norðurevropa í ár, áðrenn farið verður á eina heimsfevnandi ferð í 2025.
Fyrsta almenna ferðin verður tann 3. mai, og eftir tað verður The British Isles Festival Voyage á skránni, har skipið verður alment doypt í Liverpool tann 3. juni.
Her er eitt videobrot um nýggja skipið, har eisini samrøða er við Inger:
Deil á Facebook
