Dani setti ferð á finskan fótbólt

Johannes Frants Hans Blenner (til 1901 Hansen ella Johannes Blenner (f. 23. juli 1879 í Keypmannahavn – d. 21. september 1936 í Helsinki) var ein handilsmaður, reiðari og undangongumaður í fótbólti, sum búði í Finnlandi frá 1904, har hann fekk ríkisborgararætt í 1907. Blenner átti verksmiðjuna Jokelan Tiilitehdas, sum gjørdi múrsteinar, í Tuusula frá 1917 til 1933. Hann átti ein týðandi leiklut í, at fótbóltsspælið í Finnlandi fekk fótin fyri seg, tí hann skipaði fyri fyrsta fótbóltsdystinum og var við til seta finska fótbóltssambandið á stovn í 1907. Við royndunum úr útlandinum tók hann ofta stig til at bøta um umstøðurnar, harímillum syrgdi hann fyri, at læknataska gjørdist krav undir hvørjum dysti.

Á ungum árum íðkaði Johannes Blenner fleiri ítróttagreinar í heimlandinum. Hann stóð seg best í súkkling, sum hann eisini íðkaði á úrvalsstigi í 1899. Árið frammanundan hevði hann búleikast í London, har hann spældi fótbólt fyri Tottenham Trach. Áðrenn hann flutti til Finnlands í 1904, hevði hann spælt fótbólt í Týsklandi, Skotlandi, Svøríki og Russlandi. Hann var ein harðførur verjuleikari.

Í Helsinki var Blenner virkin innan nýstovnaða Ítróttafelagið Unitas, har hann var formaður í fótbóltsdeildini. Ítróttafelagið Unitas varð stovnað summarið 1905, tá íðkarar rýmdu úr Reipas Helsinki og fótbóltsspælið átti fremstu raðfesting.

Í 1906 skipaði Blenner fyri fyrsta almenna fótbóltsdystinum í Finnlandi, tá Unitas møtti áhugafelagnum Sport úr St. Pætursborg í einari ítróttakapping, tá onki heimligt lið hættaði sær at møta Unitas. Tað var fyrsti finski fótbóltsdysturin, hóast arbeiðarar, sjómenn og skúlanæmingar høvdu spælt fótbólt síðani einaferð í 1870-árunum. Unitas tapti heili 0-15, men teir mistu ikki mótið hóast tað. Unitas bjóðaði áhugafelagnum, sum var mannað við bretum, ið búleikaðust í St. Pætursborg, til ein seinna dyst í september, tá fyrsti rættiligi fótbóltsdysturin varð spældur í kappingini, sum fór fram á Kaisaniemi Park.

Dysturin varð spældur á sandvølli sunnumorgunin tann 9. september kl. 11 og finnarnir formáddu sær lítið ímóti russunum, tí hann endaði við einum 3-0 sigri til liðið frá St. Pætursborg. Russararnir kringsettu finska brotsteigin, men málverjin, D. Cable, og bakkarnir, Johannes Blenner og F. Filippula, stóðu seg manniliga í finsku verjuni. Danin Johannes Blenner var eisini liðskipari hjá Unitas.

Russararnir førdu 1-0 í steðginum upp á brotsspark, men øktu beinanvegin í seinna hálvleiki. Teir brendu eisini eitt brotsspark, áðrenn teir skoraðu til endaliga úrslitið 3-0. Hóast keðiliga úrslitið verður kappingin roknað sum byrjanin til kappingina um finska meistaraheitið, tí Unitas í oktober sama ár skipaði fyri einari landskapping. Landskappingin varð skipað sum ein steypakapping og soleiðis varð kappingin um finska meistaraheitið eisini skipað fyrstu árini (frá 1908 til 1930).

Unitas helt áfram at spæla altjóða dystir várið eftir, tá teir fingu vitjan av St. Pætursborg-feløgunum Newsky og Neva umframt svenska Östermalms IF úr Stockholm. Í mai 1907 var Unitas eisini við til at seta finska fótbóltssambandið á stovn saman við seks øðrum feløgum.

Finska meistaraheitið varð fyrstu ferð avgreitt í 1908, tá Urheiluseura  Unitas vann 4-1 í finaluni á Polyteknikkojen Urheiluseura. Meistaraliðið var mannað við Algoth Niska, Oscar Jansson, George Easton, Gösta Löfgren og Ernst Schybergson. Millum týðandi fótbóltspersónarnar í finskum fótbólti var danskt-føddi handilsmaðurin Johannes Blenner og hann var eisini dómari í finaluni, hóast hann var bakstudningur hjá Unitas.

Blenner syrgdi eisini fyri, at Akademisk Boldklub vitjaði í Finnlandi um heystið 1909. Sjálvur virkaði Blenner sum dómari í dystinum. Sum dómari hevði hann sín sermerkta stíl, har áskoðarar ofta funnust at hansara dømingum og sendu klagur inn til fótbóltssambandið.

Unitas meldaði seg til kappingina um finska meistaraheitið í 1909 og 1910, men avlýsti báðu ferðir. í 1909 tók Unitas seg úr, tá SPL (finska fótbóltssambandið) burturvísti leikarum úr felagnum. Unitas luttók ongantíð aftur í landskappingini. Felagið varð upployst í 1945.

Johannes Blenner giftist við við Lilly Kajanus-Blenner, sum var dóttir tónaskaldið Robert Kajanus, í 1915. Blenner doyði eftir stutta sjúkralegu í Helsinki tann 21. september 1936; bert 57 ára gamalur. Hann liggur grivin á Hietaniemi kirkjugarðinum.