Tvey uppskot eru til nýtt forfólk í Tjóðveldi. Tað er greitt, eftir at freistin hjá økisfeløgunum at lata uppskot inn fór á middnátt í gjárkvøldi. Í uppskoti eru Bjørt Samuelsen og Sirið Stenberg, tað boðar Tjóðveldi frá í morgun.
Tjóðveldi skal eisini hava nýtt næstforfólk. Í uppskoti er virkandi næstforkvinnan, Hervør Pálsdóttir.
Eykafloksting í Tjóðveldinum verður leygardagin 2. novembur klokkan 12 á Hotel Føroyum við tveimum evnum á skrá. Valið av forfólki og valið av næstforfólki.
Ein limur í Tjóðveldi skeyt eisini Dennis Holm upp til nýtt forfólk, men hann hevur boðað frá, at hann ikki tekur við valinum.
Fríggjakvøldið legði Høgni Hoydal mitt í samrøðu í Degi og Viku frá sær, sum formaður floksins, og tá gjørdist greitt, at nýtt forfólk skuldi veljast.
Deil á Facebook
