Føroyar hava framvegis hægsta vinnutíttleika í Evropa, og í 2024 var hann 85 prosent millum tey 15 til 74 ára gomlu. Tað vísa nýggjastu hagtølini frá Hagstovuni.
Tað merkir, at ein stórur partur av fólkinum hevur tilknýti til arbeiðsmarknaðin. Serliga føroyskar kvinnur hava ein høgan vinnutíttleika samanborið við onnur lond.
Hagtøl frá kanningini av arbeiðsmegini í 2024 vísa, at vinnutíttleikin í Føroyum er hægstur í Evropa, frammanfyri Ísland, har hann er 80 prosent. Í hinum Norðurlondunum er hann munandi lægri; í Danmark og Svøríki er hann 74 prosent, og í Noregi 73 prosent.
Eitt sermerkt við føroyska vinnutíttleikan er, at munurin millum kynini er lítil. Í Føroyum er vinnutíttleikin hjá monnum 87 prosent, samanborið við 85 prosent í Íslandi og 78 prosent í Danmark. Hjá kvinnunum er hann 83 prosent í Føroyum, 75 prosent í Íslandi og 71 prosent í Danmark.
Eisini er vinnutíttleikin høgur millum bæði tey yngru og eldru í Føroyum.
Millum tey 15 til 20 ára gomlu er hann 73 prosent, samanborið við 70 prosent í Íslandi og 57 prosent í Danmark.
Millum tey 65 til 69 ára gomlu er hann 67 prosent, og hjá teimum 70 til 74 ára gomlu er hann 33 prosent—meira enn tvífalt so nógv sum í Íslandi og Danmark.
Tølini vísa, at Føroyar hava ein serliga sterkan arbeiðsmarknað, har bæði menn og kvinnur í nærum øllum aldursbólkum eru á arbeiðsmarknaðinum í stórum tali.
Deil á Facebook
