Mikudagin fór A-landsliðið við monnum í flogbólti til Íslands, har fyrsta umfarið hjá teimum í Silvurliguni verður spælt. Í dag kl. 18 verður spælt ímóti Íslandi, og leygardagin kl. 16 verður spælt ímóti Svøríki.
Vónirnar at vinna á Íslandi eru góðar. Í fjør møttu Føroyar Íslandi tvær ferðir í Silvurliguni, og tá vunnu liðini hvør sín dyst, og í venjingardystunum teirra millum í mai í ár vunnu liðini aftur hvør sín dyst.
Ísland hevur longu spælt tveir dystir í kappingini og hevur tapt teir báðar 3-0 fyri Luksemborg og Eysturríki.
Leygardagin spæla so Føroyar ímóti Svøríki, sum tykist at vera væl sterkari enn Føroyar og Ísland. Eisini Svøríki hevur spælt tveir dystir og hevur vunnið teir báðar sannførandi 3-0 á Aserbadjan og Georgia.
Tilsamans átta lið eru við í Silvurliguni, og Føroyar skuldu spæla ímóti seks av teimum. Umframt Íslandi og Svøríki møta Føroyar eisini Aserbadjan, Eysturríki, Luksemborg og Georgia. Einasta liðið, Føroyar ikki møta, er Ungarn.
Dystirnir ímóti Aserbadjan og Eysturríki verða spældir í ítróttarhøllini á Sandi ávikavist 20. og 22. juni. Seinasta umfar spæla Føroyar ímóti Luksemborg og Georgia 28. og 29. juni í Georgia.
Landsliðsmanningin hjá Føroyum:
- Bjarni Joensen, kantur
- Filip Ilic, Kantur
- Hákun Nón, Kantur
- Mattias Nolsøe Isaksen, kantur
- Hjørtur Joensen, diagonalur
- Hjørtur Sólstein, diagonalur
- Niels Niclasen, hevari
- Thorvald Danielsen, hevari
- Silas Poulsen, libero
- Tórður Gunnarsson Højsted, libero
- Vuk Ilic, miðblokkur
- Jákup Árni Elisson Wang , miðblokkur
- Rani Ákason, miðblokkur
- Jóhan Arni Elisson Wang, miðblokkur
Venjari: Boban Ilic
Hjálparvenjari: Oleksandr Dmytriiev
Fysiskur venjari: Riccardo Santangelo
Fysioterapeutur: Niklas Reginsson, NB Fysioterapi
Deil á Facebook
