Betrideildin: Spennandi dystir í Sørvági og Klaksvík

(Savnsmynd: Sverri Egholm)

20. umfar í Betrideildini við monnum verður spælt um vikuskiftið.

Fyrsti dysturin verður spældur í Sørvági leygardagin klokkan 17.00, tá ið botnliðið 07 Vestur tekur móti TB, sum eisini liggur undir niðurflytingarstrikuni.

Fyri 07 Vestur er alt avgerandi at vinna hendan dystin, um teir skulu halda lív í vónini at sleppa undan niðurflyting. Liðið hevur tapt seinastu fimm dystirnar og liggur aftast í deildini við bert sjey stigum.

TB hevur eisini havt trupult við at fáa úrslit, men hevur kortini skava onkur stig saman og liggur á níggjunda plássi við ellivu stigum. Hetta er ein klassiskur “seks-stigs dystur”, har bæði lið hava brúk fyri sigri.

Sunnudagin verða fýra dystir spældir, tríggir klokkan 15.00 og ein klokkan 17.00.

Í Klaksvík tekur oddaliðið KÍ móti næststerkasta liðnum HB. Hetta er toppdysturin í umfarinum. KÍ enn er ósigrað við 17 sigrum og einum javnleiki. HB hevur eisini verið í góðum formi og hevur vunnið fýra av seinastu fimm dystunum. Við sigri kann HB minka munin upp til KÍ niður í fimm stig, men KÍ hevur leikt ein dyst færri, so tað er nærum óhugsandi at spenningur kann koma í kappingina um meistaraheitið.

Á ovara vølli í Havn spæla B36 og B68. B36 hevur tapt tríggjar teir seinastu dystirnar og hevur mist fótafestið í miðjuni. B68 hevur eisini havt trupult við at fáa stig og liggur á sjeynda plássi. Bæði lið hava tørv á einum sigri.

Í Runavík tekur NSÍ móti Suðuroy. NSÍ var í framúr formi fyrst í kappingárinum og hevur skorað flest mál av øllum liðum, heili 71 mál í 19 dystum. Seinastu dystirnar hevur tó gingið meira striltið hjá NSÍ, sum hevur mist annað plássið til HB.

FC Suðuroy hevur seinstu umførini stríðst seg upp um niðurflytingarstrikuna við nøkrum góðum úrslitum. Men NSÍ er stórfavorittur at vinna dystin á heimavølli.

Seinasti dysturin í 20. umfari verður spælt klokkan 17.15 í Sarpugerði, har Víkingur tekur móti EB/Streymi. Víkingur liggur á fjórða plássi og hevur vunnið tríggjar av seinastu fimm dystunum. EB/Streymur hevur ikki vunnið í fimm dystir og hevur trupult við at halda fast í miðjuni. Dysturin er ein góður møguleiki hjá Víkingi at styrkja støðuna í topp fýra.

Dystarskráin – 20. umfar

Leygardagur 23. august

• Kl. 17.00: 07 Vestur – TB (í Sørvági)

Sunnudagur 24. august

• Kl. 15.00: KÍ – HB (í Klaksvík)
• Kl. 15.00: B36 – B68 (í Havn)
• Kl. 15.00: NSÍ – Suðuroy (í Runavík)
• Kl. 17.15: Víkingur – EB/Streymur (í Norðragøtu)

Stigatalvan – Betrideildin