Bjørn hevur fingið heiður fyri “dirvi í bardaga”

Tað eru 853 dagar síðan, at Russland tann 24. februar í 2022 gjørdi innrás í Ukraina. Bjørn Kallsoy, sum hevur fingið eyknevnið “Viking” av sínari herdeild í Ukraina, hevur verið heilt úti í frontinum í Ukraina nærhendis ukrainska býin, Sloviansk, og hevur eisini merkt kríggið upp á egnan kropp. Nú er hann aftur í Føroyum, men hóast tað, so hevur hann javnan samband við sína herdeild, sum hann var partur av í Ukraina, og í síðstu viku fekk hann ein pakka sendandi. Pakkin var ikki frá sínari herdeild, men frá ukrainska hernaðarráðnum, sum hevur givið Bjørn Kallsoy ein heiður fyri “dirvi í bardaga”. – Eg mátti skriva til mína herdeild í Ukraina, hvat hendan medaljan er fyri, og svarið eg fekk var iorn cross (award for personal bravery in combat actions), sigur Bjørn Kallsoy. (Greinin heldur fram undir myndini) Umframt hesa fjórðu medaljuna, so hevur Bjørn fingið tríggjar aðrar medaljur, fyri sín innsats í Ukraina; eina fyri at fremja bragd, eina fyri drúgva tænastu og eina fyri at koma aftur í hertænastu, eftir at hava verið særdur. Júst nú er Bjørn Kallsoy í Føroyum, men í sendingini á FM1, Á Sýnini, greiddi hann frá, at hann fer aftur til Ukraina at hjálpa til. – Um tað ikki verður á frontinum, so verður tað at hjálpa upp á onkran máta, tí tað er stórur tørvur á hjálp í Ukraina. Eg arbeiddi eitt sindur sum verkfrøðingur seinasta tíðina, eg var har, men tað er millum annað eisini tørvur á sjúkrarøktarfrøðingum í landinum. Ein kann hjálpa í Ukraina upp á ymiskan hátt, sigur Bjørn Kallsoy. Til ber at hoyra Bjørn Kallsoy greiða frá sínum hendingum í Ukraina her. Hinar tríggjar medaljurnar, ið Bjørn Kallsoy hevur fingið fyri sína hertænastu í Ukraina; eina fyri at fremja bragd, eina fyri drúgva tænastu og eina fyri at koma aftur í hertænastu, eftir at hava verið særdur