Eitt vet betri hjá VB í dag

SMS kvinnur
VB – H71 25-37 (12-18)

Fríggjkvøldið vann H71 39-16 móti VB í steypakappingin hjá kvinnum. Í dag var tað so túrurin hjá hoyvíkskvinnum at fara suður um fjørð. Hesaferð gekst heldur frægari hjá VB, sum í einar 20 minuttir var so nøkulunda við í dystinum. Tá var støðan 12-9 til H71.

Tað var tó ongantíð nakar sum helst ivi um úrslitið, til tess er munurin á liðunum alt ov stórur. Í hálvleikinum var H71 komið fram um 18-12, og í seinna hálvleiki øktist munurin til úrsltið 37-25 til H71.

Hjá VB hongur nógv av málskjótingini á brasilsku Carmen Luiza Silva, sum í dag skoraði 8 ferðir. Agatha Kjærbæk Djurhuus skoraði 5 mál.

Hoyvíkskvinnur deildust væl um málini, og 12 leikarar skoraðu. Brynhild Pálsdóttir skoraði 6 mál. Inga Maria Joensen og Anna Elisabeth H. Weyhe skoraðu 5 mál hvør.

Mikukvøldið spæla kvinnurnar hjá H71 í Vestmanna móti VÍF, áðrenn tær næsta vikuskiftið spæla tveir dystir í European Cup móti PAOK úr Grikkalandi. Báðir dystirnir verða spældir í Føroyum.

Dysturin á Handballstatz

Dómaraseðil á hsf.fo

Stigatalva SMS Kvinnur