H71 vann lættliga á VB

Faxe Kondi kvinnur
H71 – VB 39-16 (23-7)

Ársins fyrsti dystur í Faxe Kondi steypakappingini hjá kvinnum var spældur í Hoyvíkshøllini í kvøld, tá ið VB vitjaði H71.

H71 var stórfavorittur at vinna dystin, men tað gekk tó ein lítil løtu, áðrenn tær sluppu frá vágskvinnum. Tað riggaði hjá VB at fáa ferðini nakað úr dystinum við at hava long álop, og so hjálpti tað eisini VB, at H71 brendi fleiri møguleikar.

Meðan VB í álopinum spældi so nøkulunda, so sá verri út í verjupartinum. Fyri tað fyrsta so kláraðu tær als ikki at renna aftur við skjótálopunum hjá H71, og fyri tað næsta var grundverjan alt ov ótøtt til at standa móti ágangandi álopsspælinum hjá H71. Serliga í høgru síðu fóru systrarnar Elsa Egholm og Karin Egholm í gjøgnum verjuna nærum sum teimum lysti, og hjá VB var gott, at málverjin, Gaia Ben Zikri, tók fleiri skot.

VB fylgdi við so nøkulunda til støðuna 8-6, tá ið tólv minuttir vóru spældir. Men so gekk ikki longur. H71 skoraði nærum hvørt álop, og tað gjørdi tað heldur ikki betri hjá VB, at tær brendu fleiri leys skot, sum áttu at farið í málið. Carmen Luiza Silva, sum hevur skotið nógv mál fyri VB í landskappingini, hevði eisini ein av sínum minni góðum dystum.

VB skoraði bara eitt einasta mál seinastu 18 minuttirnar av fyrra hálvleiki, og liðini fór at hvíla seg við støðuna 23-7.

Gongdin helt fram í seinna hálvleiki, hóast vanligu útskiftisleikararnir hjá H71 vóru á vøllinum. Fimm ferðir skoraði H71, áðrenn VB aftur fekk mál.

Framvegis var alt ov lætt hjá H71 at koma gjøgnum verjuna hjá VB, og um VB skal betra seg, so er tað fyrst og fremst í verjuni, og bøtast skal um viljan og góðskuna í verjuspælinum. Tær mugu heilt einfalt renna skjótari aftur, og so tora at taka fatt og hjálpa hvørjari aðrari í grundverjuspælinum.

Málskjótingin javnaði seg nakað, sum seinni hálvleikur leið, og H71 vann dystin 39-16.

Fyri H71 skoraðu Elsa Egholm, Maria Halsdóttir Weyhe og Tóra Róadóttir fimm mál hvør, og hjá VB gjørdist Carmen Luiza Silva eisini fimm mál.

Dysturin á Handballstatz

Dómaraseðil á hsf.fo

Støðan Faxe Kondi Kvinnur bólkur 1