Hámarkskvotan av felags makrelkvotuni verður nú hækkað. Tað avgerðina hevur landsstýrismaðurin í fiskivinnumálum, Dennis Holm, tikið.
Hámarkið verður hækkað úr 4.500 tonsum upp í 6.000 tons.
Tað kunnger landsstýrismaðurin á heimasíðuni hjá fiskivinnu- og samferðslumálaráðnum.
Sambært makrelkunngerðini, so kann landsstýrismaðurin, um líkindi eru fyri, at tann flutta kvotan ikki verður fullnýtt, broyta ella taka burtur hámarkið.
– Við støði í skrásettari veiðinøgd higartil av fluttu makrelkvotuni tilsamans og fyri hvørt skipið sær, og samanhildið við, hvat skip hava eftir at fiska av teirra egnu kvotum, og at vertíðin fyri makrelfiskiskapin í føroyskum og altjóða sjógvi fer at halla, er niðurstøða gjørd um, at líkindi eru fyri, at tann flutta kvotan ikki verður fullnýtt, skrivar heimasíðan hjá fiskivinnumálaráðnum.
Tískil hevur Dennis Holm, landsstýrismaður, tikið avgerð um at hækka hámarkið úr 4.500 tonsum upp í 6.000 tons.
Broytingin fær gildi beinanvegin.
