Strandferðslan skrivaði fyrr í vikuni undir sáttmála við smápartafelagið 12.08.09 um sølu av ferjuni Hasfjord til at høgga upp. Hasfjord varð selt fri 410.000 krónur.
Hetta sigur Strandferðslan í dag.
Felagið, sum keypti Hasfjord, heldur til a Skála, og Hasfjord liggur í løtuni á Strondum.
Hasfjord varð upprunaliga keyptur úr Noregi í 2019 til at flyta byggiútgerð og betong um Skopunafjørð í samband við Sandoyartunnilin. Talan bleiv eisini um aðra farmasigling í oynna.
Kostnaðirnir av umvælingum, meðan Hasfjord var í rakstri, vóru høgir, og nógvir liggidagar vóru vegna ymisk brek ella óhapp. Eisini krøvini frá klassanum blivu meiri krevjandi.
Landsstýrismaðurin tók tí í samráð við Strandferðsluna um miðjan juni avgerð um at taka skipið endaliga úr sigling.
Hasfjord varð upprunaliga bygdur í 1975 og er harvið 48 ára gamal. SSL keypti skipið í desember 2019 fyri 3,5 mió.kr og umvældi tað fyri 5,2 mió.kr, so at samlaði úveganarkostnaðurin var 8,7 mió.kr.
Rakstrarkostnaðurin av Hasfjord fyri árini 2020 til 2023 var 21,2 mió.kr. Íalt blivu sostatt brúktar knappar 30 mió.kr upp á Hasfjord.
Deil á Facebook
