Frá 1. januar 2026 verður nýtt Heilivágsráð sett á stovn. Endamálið er at tryggja, at heilivágur verður brúktur skynsamt, og at tilfeingið á heilsuøkinum verður gagnnýtt sum best.
Tað kemur fram í uppskoti til kunngerð um Heilivágsráð, sum Heilsumálaráðið hevur sent til ummælis. Uppskotið byggir á heimild í heilivágslógini.
Ráðið verður mannað við limum úr ymsum heilsustovnum: Landsapotekarin, stjórin í Heilsutrygd, læknafakligt umboð fyri Heilsutrygd og Sjúkrahúsverkið, og umboð fyri Apoteksverkið. Heilsutrygd hevur forfólks- og samskiparaleiklutin, men samskiparin er ikki limur í ráðnum.
Millum uppgávurnar hjá ráðnum eru:
- At kunna læknar um skynsama nýtslu av heilivági.
- At gera leiðreglur, til dømis listi við fyrstaval av heilivági.
- At ráðgeva stovnum og myndugleikum um mál, ið verða mett at hava fíggjarligar avleiðingar fyri landið.
- At skráseta heilivág og dagføra heilivágsskránna.
Arbeiðsøkið fevnir um allar heilivágsútreiðslur á heilsuøkinum, uttan serligan sjúkrahúsheilivág. Eisini umboðar tað kostískoyti, hjálparráð og útgerð, sum Heilsutrygd stuðlar.
Hálva hvørt ár skal ráðið lata frágreiðing um útreiðslugongdina til Heilsumálaráðið.
Samstundis fer kunngerð nr. 69 frá 1991 úr gildi.
Viðmerkingar til uppskotið kunnu gerast fram til 13. august.
Deil á Facebook
