Føroyska kvinnulandsliðið í hondbólti, sum fríggjadagin fyri fyrstu ferð nakrantíð spælir dyst í einum EM-endaspælið, er sera ungt.
Flestu leikararnir eru blaðungir, og so eru nakrar heilt fáar, sum hava drúgvari royndir á vøllinum.
Flestu av berandi leikarunum spæla í bestu og næstbestu deildini í Danmark. Tó spæla umleið helvtin av landsliðsleikarunum í føroyskum hondbólti.
Her er ein gjøgnumgongd av føroysku landsliðsleikarunum.
1 Annika Fríðheim Petersen
Málverji
Fødd: 1. juni 1999
Hædd: 1,79 cm
Felag: EH Aalborg (Danmark)
27 landsdystir
Annika Fríheim Petersen er uppvaksin í H71, áðrenn hon fór til Íslands at spæla í 2021. Síðan hevur hon roynt seg í Nykøbing Falster í bestu donsku deildini og í Follo í Noreg. Nú spælir hon saman við Lív Sveinbjørnsdóttir Poulsen við EH Aalborg í bestu donsku deildini.
2 Elsa Egholm
Høgri bakkur
Fødd: 21. juni í 2003
Hædd: 1,73 cm
Felag: H71
18 landsdystir og 21 mál
Elsa Egholm spælir enn í barndómsfelagnum H71. Hon er sterkur verjuleikari, og tað er har hon fyri tað mesta verður brúkt á landsliðnum. Verður tó eisini brúkt á høgra bakki, har hon av høgra bakki dugir sera væl at fara millum bakk og vong.
4 Brynhild Pálsdóttir
Høgri vongur
Fødd: 5. mars 2003
Hædd: 1,73 cm
Felag: H71
7 landsdystir og 6 mál
Vongurin er uppvaksin í H71. Er aftur í H71 eftir ein stuttan steðg í Ajax í donskum hondbólti. Er vanliga tryggur skjútti, og er eisini sterk í verjuni.
6 Marita Mortensen
Vinstri bakkur
Fødd: 29. mars 2001
Hædd: 1,77 cm
Felag: HØJ (Danmark)
14 landsdystir og 17 mál
Marita Mortensen er einasti veruligi langskjúttin á føroyska liðnum. Er uppvaksin í H71 og var ein av týðandi leikarunum, tá ið H71 meldaði lið til bestu deildina í Føroyum. Spældi eitt skifti við Vendsyssel í Danmark, kom so aftur til H71 eitt skifti. Spælir nú við Høj, sum er oddalið í næstbestu donsku deildini.
7 Bjarta Osberg Johansen
Strika
Fødd: 28. apríl 1993
Hædd: 1,69 cm
Felag: Kyndil
27 landsdystir og 27 mál
Bjarta Johansen er tann elsta á liðnum og telist eisini millum tær við flest landsdystum. Hevur fyri tað mesta spælt við Kyndli, men hevur eisini roynt seg í donskum hondbólti. Bjart aJohansen er eyðkend fyri sterkan stríðsvilja og kann við sínum verjuspæli lyfta eina heila verju.
8 Rannvá Olsen
Vinstri vongur
Fødd: 22. januar 2003
Hædd: 1,67 cm
Felag: VÍF
14 landsdystir og 24 mál
Hevur fyri tað mesta spælt við VÍF, men spældi við H71 kappingarárið 2021/22, tá ið H71 var meistari og kom langt í evropeiskum hondbólti.
10 Súna Krossteig Hansen
Bakspælari
Fødd: 29. mars 2000
Hædd: 1,67 cm
Felag: Skanderborg Håndbold (Danmark)
31 landsdystir og 74mál
Súni Krossteig Hansen vaks upp í Kyndli, og spældi nøkur á við besta liðnum hjá Kyndli. Hevur seinnu árini spælt í donskum hondbólti við Aalborg, og Ajax København. Spælir nú við Skanderborg. Er sera sterk í gjøgnumbrotsspælinum.
11 Turið Arge Samuelsen
Vinstri vongur og vinstri bakkur
Fødd: 27. desembur 1994
Hædd: 1,63 cm
Felag: Kyndil
40 landsdystir og 123 mál
Hevur so at siga bara spælt í Kyndli. Var upprunaliga ein av bestu vinstru veingjum í Føroyum, men hevur seinna árini skotið eitt ótal av málum av vinstra bakki hjá Kyndli. Á landsliðnum spælir hon fyri tað mesta vinstri vongur, men roynir seg eisini í løtum á vinstra bakki.
13 Brynja Høj
Strika
Fødd: 29. februar 1996
Hædd: 1,71 cm
Felag: Neistin
19 landsdystir og 8 mál
Brynja Høj hevur bara spælt fyri Neistan. Hon er sera sterkur miðverjuleikari og er við sínum royndum og stríðsvilja ein av teimum, sum gongur undan á føroyska liðnum.
18 Pernille Brandenborg
Strika
Fødd: 29. juni 1997
Hædd: 1,85 cm
Felag: København Håndbold (Danmark)
42 landsdystir og 59 mál
Er uppvaksin í Danmark, men hevur síðan 2016 spælt við føroyska landsliðnum. Hevur í Danmark spælt við Vendsyssel og Randers. Spælir nú við København Håndbold í bestu donsku deildini, har hon eisini er liðskipari.
22 Bjørk Franksdóttir Joensen
Høgri bakkur
Fødd: 2. novembur 2004
Hædd: 1,69 cm
Felag: Randers HK (Danmark)
8 landsdystir og 6 mál
Er uppvaksin í Neistanum. Men í summar skifti lámurin til Randers HK í donskum hondbólti.
23 Lív Sveinbjørnsdóttir Poulsen
Høgri vongur
Fødd: 27. desembur 2001
Hædd: 1,73 cm
Felag: EH Aalborg (Danmark)
22 landsdystir og 45 mál
Er uppvaksin í VÍF, men fór blaðung til Danmarkar at spæla. Hevur spælt við Herning-Ikast, Ajax København, TMS Ringsted og nú spælir nú saman við Anniku Fríðheim Petersen í EH Aalborg. Var heima í hálvt ár kappingarárið 2020/21, og spældi týðandi leiklut á meistaraliðnum hjá StÍF. Er sera sterk í verjuspælinum.
29 Lív Bentsdóttir Zachariasen
Bakspælari
Fødd: 11. apríl 2002
Hædd: 1,77 cm
Felag: Ajax København (Danmark)
10 landsdystir og 7 mál
Uppvaksin í H71 og var sera týðandi verjuleikari á sterka H71-liðnum, sum gjørdist føroyameistari og kom langt í Evropa. Eftir ein skaða í krossbandinum, spælir hon nú við Ajax København og er júst komin aftur á landsliðið.
44 Anna Elisabeth Halsdóttir Weyhe
Vinstri vongur
Fødd: 30. oktobur 2005
Hædd: 1,66 cm
Felag: H71
6 landsdystir og 19 mál
Er yngsti leikarin á liðnum. Er uppvaksin og spælir við H71. Í H71 spælir hon fyri tað mesta á vinstra bakki, men á landsliðnum er hon vinstri vongur.
46 Lukka Arge
Bakspælari
Fødd: 28. juni 2004
Hædd: 1,79 cm
Felag: H71
5 landsdystir og 0 mál
Er uppvaksin í Danmark, men hevur búð í Føroyum í nøkur ár og spælir nú við H71. Verður mest brúkt í verjuni og er eisini brotskastskjútti á landsliðnum. Dugir væl at seta skjót mótálop í gongd.
57 Maria Pálsdóttir Nólsoy
Bakspælari
Fødd: 19. august 2004
Hædd: 1,76 cm
Felag: HH Elite (Danmark)
13 landsdystir og 36 mál
Uppvaksin í Neistanum og hevur verið týðandi leikari hjá besta kvinnuliðnum í Neistanum, áðrenn hon í summar fór til Danmarkar at spæla við HH Elite í bestu donsku deildini. Er góður gjøgnumbrotsspælari, men kann eisini skjóta útifrá.
77 Jana Mittún
Spælskipari/miðja
Fødd: 24. novembur 2003
Hædd: 1,72 cm
Felag: Viborg HK (Danmark)
20 alndsdystir og 89 mál
Er uppvaksin í H71, og var helst týdningarmiklasti leikarin hjá H71, áðrenn hon í 2023 fór at spæla við Viborg HK í bestu donsku deildini. Er tað nærmasta vit koma einum stjørnuleikara á føroyska liðnum. Er kvik, gjøgnumbrotssterk og áhaldandi í sínum spælimáta.
88 Rakul Wardum
Málverji
Fødd: 12. juni 2002
Hædd: 1,76 cm
Felag: Ringkøbing Håndbold (Danmark)
20 landsdystir og mál
Rakul Wardum er uppvaksin Kyndli. Fór blaðung til Skanderborg í Danmark. Hevur eisini spælt í Ajax København og spælir nú við Ringkøbing í bestu donsku deildini.
Deil á Facebook
