Føroysku hondbóltskvinnurnar eru í styrkisbólki 3, tá ið kastast skal lut um, hvussu skal spælast í HM-endaspælinum í kvinnuhondbólti, sum verður í Týskalandi og Niðurlondum frá 26. novembur til 14. desembur. 32 lond fara at kappast, harav 18 eru úr Evropa.
Lutakastið verður hildið í Noordbrabants Museum í Niðurlondum hósdagin í næstu viku.
Føroyar eru í styrkisbólki 3 saman við Kekkia, Japan, Senegal, Íslandi, Argentina, Suðurkorea og Tunisia.
Í sterkasta styrkisbólkinum eru heimsmeistararnir úr Fraklandi, OL-meistararnir úr Noreg umframt Danmark, Týskland, Niðurlond, Ungarn, Svøríki, og Montenegro.
Tað er frammanundan avgjørt, at Føroyar spæla í HM-bólki D í týska býnum Trier, sum er ein av elstu býum í Týsklandi. Hann er nær við markið til Luksemborg, og har búgva umleið 110.000 fólk.
Styrkisbólkar HM-endaspælinum í kvinnuhondbólti 2025
Styrkisbólkur 1: Frakland, Noreg, Danmark, Týskland, Niðurlond, Svøríki, Ungarn, Montenegro
Styrkisbólkur 2: Pólland, Brasil, Serbia, Rumenia, Sveis, Spania, Eysturríki, Angola
Styrkisbólkur 3: Kekkia, Japan, Senegal, Ísland, Argentina, Føroyar, Suðurkorea, Tunesia
Styrkisbólkur 4: Kina, Kroatia, Egyptaland, Uruguai, Kasakstan, Paraguai, Kuba, Iran
Deil á Facebook
