Ísrael fer ikki at loyva, at Gaza fær streym ella vatn, áðrenn ísraelsku gíslarnir, ið Hamas hevur tikið í Gaza, verða latnir leysir aftur.
Tað sigur ísraelski orkumálaráðharrin, Israel Katz á X, sum áður æt Twitter, sambært Times of Israel og AFP-tíðindastovuni. – Humanitera hjálp til Gaza? Eingin knøttur til streymin verður tendraður, eingin vatnpumpa verður latin upp og einki brennievni fer inn, áðrenn ísraelsku gíslarnir eru vendir aftur heim, sigur hann í uppslagnum.
150 gíslar í Gaza
Hernaðarliga rørslan Hamas hevur tikið fleiri gíslar, sum verða hildin aftur í Gaza.
Sambært Times of Israel, so er talið av gíslum í Gaza mett til at vera 150, og fleiri av teimum vera mett at hava latið lív.
Í gjár, mikudagin, steðgaði einasta kraftverki í Gaza, tí eingin olja var eftir, upplýsa orkumyndugleikarnir í Gaza.
1.200 dripin í Ísrael
Hetta hendir, eftir at Ísrael hevur sett stongsil av Gaza í verk sum aftursvar til blóðuga álopið hjá Hamas í Ísrael.
Tilsamans eru í minsta lagið 1.200 fólk deyð í Ísrael, meðan onnur 2.700 eru særd í samband við álopið hjá Hamas.
Ísrael hevur svarað aftur við at bumba fleiri hundrað mál í Gaza, sum hevur verið bumbað síðan leygardagin av ísraelska flogvápninum, eftir at forsætisráðharrin í Ísrael, Benjamin Netanyahu, hevur boðað frá kríggi ímóti hernaðarrørsluni, Hamas.
Kelda: Ritzau
Deil á Facebook
