Julian Johansen er settur sum sølustjóri í orkufelagnum Magn.
Julian Johansen er 33 ár og hevur bæði fjølbroyttar og drúgvar sølu- og leiðsluroyndir. Hann hevði verið søluleiðari í LM Electric í átta ár, tá hann saman við øðrum stovnaði heilsøluna NORT fyri skjótt tveimum árum síðan. Julian Johansen er kanska best kendur sum hondbóltsvenjari, har hann saman við Mark Marcher hevur stýrt úrmælingunum á U21-landsliðnum, umframt at hann er hjálparvenjari á manslandsliðnum.
Magn veitir teimum føroysku húsarhaldunum, virkjunum og skipunum orku hvønn dag, og sum sølustjóri skal Julian Johansen saman við hinum í hópinum røkja góða og trúfasta sambandið og samskiftið við kundarnar.
