Julian tók metið á 1500 metrum

Týsdagin setti rennarin Julian Gregersen nýtt føroyskt mett í 1500 metra renning.

Hann rann teinin upp á 3 minuttir og 54,36 sekund, tá ið hann rann í Trafford AC Grand Prix í Manchester í Onglandi.

Við hesum tók hann 33 ára gamla metið hjá Albert Marna Joensen, sum í 1992 rann teinin upp á 3:54,39.

Fyrr í summar tók Julian eisini 32 ára gamla metið hjá Albert Marna á 5 km á landavegi.

Á Oyggjaleikunum í Orkney gjørdi hann ein sera góðan profil. Har vann hann fleiri heiðursmerkir – eitt nú gull í liðkappingini á hálvmaraton saman við Rógva Kárason og Nela Heldarskarð.

Samanumtikið tykist Julian at vera í sínum lívs formi.