Lønirnar í Føroyum halda fram at vaksa. Tað vísa nýggjastu tølini frá Hagstovuni.
Seinastu tólv mánaðirnar vórðu knappar 13,1 milliardir krónur útgoldnar í lønu, ein vøkstur upp á 5,5 prosent samanborið við undanfarna tíðarskeið.
Størsti vøkstur sæst hjá kvinnum, serliga hjá teimum, ið arbeiða hjá arbeiðsgevara undir almennum ræði, har lønin vaks við 8,7 prosentum.
Í vinnugreinum er vøksturin størstur í Heilsu- og almannaverki, har serliga røktarvirksemi á bústovnum hevur havt stóran framgongd við yvir 10 prosentum. Hinvegin sæst minking í uppsjóvarveiðu, har lønirnar eru minkaðar við 12 prosentum.
Býtt á øki hevur Sandoyar øki størsta lønarvøkstur við næstan 12 prosentum, meðan Norðoya øki hevur minstan vøkstur við 4,2 prosentum.
Miðallønin í mai var 36.152 krónur, men er framvegis munur á lønum millum kyn. Kvinnur fingu í miðal 30.251 krónur, meðan menn fingu 41.640 krónur, ein munur upp á 27 prosent.
Hagtølini vísa greiða gongd: lønirnar hækka, men munur í kyni og vinnugreinum er framvegis sjónligur.
Deil á Facebook
