Real Madrid vendi dystinum móti Manchester City

Real Madrid megnaði at venda dystinum móti Manchester City og vann 3-2 á Etihad Stadion í Manchester.

Stórskjúttin, Erling Haaland, legði Manchester City fram um í fyrra hálvleiki, og eitt korter inn í seinna hálvleik javnaði ein av stjørnuleikarunum hjá Real, Kilian Mbappé.

Erling Haaland sendi aftur City á sigurskós við einum brotssparki, tá ið tíggju minuttir vóru eftir.

Men so gjørdi Real Madrid ein Real Madrid. Uttan at gera tað stóra komu teir aftur í aftur í vunnu dystin.

Sera ivasamt verjuspæl hjá City gav Real Madrid tvey mál. Fyrst skoraði Brahim Diaz, og í yvirtíðini hevði enski landsliðsleikarin Jude Bellingham seinasta fótin á sigursmálinum, og so var 3-2 til kongaliga felagið úr Madrid

Við eitt máls sigurinum hevur Real Madrid gott útgangstøði undan seinna dystinum, sum verður spældur á Santiago Bernabéu í Madrid næsta mikukvølid.

PSG er vaknað

Eisini franska stórfelagið Paris Saint Germain hevur beina kós víðari í Champions League. Teir vunnu 3-0 á útvølli móti Brest, sum hevur staðið seg óvæntað væl í Champions League.

Vithinha legði PSG fram um við brotssparki, og Ousmane Dembéle staðfesti sigurin við tveimum málum.

Dortmund eisini á veg víðari

Meðan tað ikki gongur nakað serligt hjá týsku Dortmund í heimligu Bundesliguni, so gongur munandi betri í Champions League, og við 3-0 sigri móti Sporting í Portugal hevur Dortmund beina kós víðari í Champions Leage.

Serhou Guirassy, Pascal Gross og Karim Adeyemi skoraðu málini í seinna hálvleiki.

PSV Eindhoven helt lív í vónini

Juventus vann heima 2-1 móti PSV Eindhoven. Úrslitið ger, at tað sýnist púra opið undan seinna dystinum, hvør fer at megna at spæla seg víðari.

Amerikumaðurin Weston McKennie legði Juventus fram um í fyrra hálvleiki. Kroatiski veteranurin, Ivan Perisic, sum fjør spældi móti HB við Hadjuk Split, javnaði fyri PSV, áðrenn Samuel Tshifunda skoraði sigursmálið fyri Juventus.