– Stýrið og stjórnin fyri ALS eru væl nøgd við úrslitið. Bæði skiftisavlopið og ársúrslitið vóru munandi betur enn árið fyri, og við avlopinum í 2023 er Arbeiðsloysisskipanin styrkt enn meira, langtíðarhaldførið er gott, og skipanin er fíggjarliga sera væl fyri at standa ímóti bakkøstum, sum kunnu koma.
Tað sigur Magni á Deild Olsen, stjóri hjá ALS, í tíðindaskrivi, nú stýrið fyri ALS hevur samtykt ársroknskapin hjá ALS fyri 2023.
Roknskapurin vísir eitt avlop upp á 225,8 mió. krónur, sum er tað mesta í søguni hjá ALS. Ársúrslitið er slakar 201 mió. krónur betri enn tað var í 2022.
Eginognin hjá ALS er nú komin upp á 1.333 mió. krónur, sum er tað mesta í søgu ALS.
Lága arbeiðsloysið, sum hevur verið í Føroyum seinastu nógvu árini, helt fram í farna árið, og í miðal fyri alt árið var arbeiðsloysið í 2023 júst tað sama sum árið fyri – 0,8%.
Tíggjunda árið á rað var arbeiðsloysið í Føroyum í 2023 tað lægsta samanborið við onnur lond í Evropa, og var eitt tað lægsta yvirhøvur í øllum heiminum.
– Tað var bara londunum Katar, Kambodja og Niger at arbeiðsloysið í 2023 var lægri, enn tað var í Føroyum, skrivar ALS.
Víðari skrivar ALS í tíðindaskrivinum, at:
“Samlaðu inngjøldini vóru 232,3 mió. krónur, sum er tað mesta, síðani ALS-gjaldið lækkaði 1. januar 2021 og tað triðmesta yvirhøvur, síðani ALS var stovnað fyri 32 árum síðani.
Undantikið árið við korona-smittuni eru samlaðu útgjøldini rættiliga støðugt minkaði síðani 2011, tá ALS rindaði 308,4 mió. krónur í arbeiðsloysisstuðli. Í 2023 vóru samlaðu útgjøldini av arbeiðsloysisstuðli 58,3 mió. krónur í mun til 62,5 mió. krónur í 2022.
Útgjøldini av vanligum arbeiðsloysisstuðli minkaðu við 4,6 mió. krónum úr 31,5 mió. krónum niður í 26,9 mió. krónur. Hinvegin vuksu útgjøldini úr fiskavirkisskipanini nakað – úr 28,1 mió. krónum upp í 28,3 mió. krónur.
Samlaða útgjaldið av arbeiðsloysisstuðli úr fiskavirkisskipanini fór harvið upp um útgjaldið av vanligum arbeiðsloysisstuðli. Tað er fyrstu fer, at tað er komið fyri.
Skiftisavlopið – tað er munurin millum samlaðu inngjøldini og samlaðu útgjøldini – gjørdist eitt avlop á 175,26 mió. krónur í mun til 159,6 mió. krónur í 2022.
Starvsfólkakostnaðirnir hækkaðu við 505 tús. krónum, sum svarar til eina hækking á 3,0%, sum er nakað minni enn tað, sum sáttmálalønirnar hækkaðu.
Rakstrarkostnaðirnir vóru 5,3 mió. krónur, sum er eitt tað lægsta seinastu nógvu árini.
Samlaðu virðisbrævaognirnar vuksu við sløkum 215 mió. krónum og vóru 1.274,1 mió. krónur við árslok í 2023.
Rættiligt órógv var á altjóða fíggjarmarknaðunum í 2022. Tað hevði við sær, at Arbeiðsloysisskipanin hevði ein miss á 113,1 mió. krónur av fíggjarognunum tað árið. Árið 2023 royndist hinvegin væl, og inntøkurnar av fíggjarognunum vóru 73,9 mió. krónur, sum svarar til eina renting á 6,5%“
Leinki til ársroknskapin fyri 2023 : https://als.cdn.fo/savn/ow2lpn55/arsroknskapur-2023.pdf?t=111&s=eYpPuqeqO_92J6SdQCuHRLzYOP4
Deil á Facebook
