Eftirmetingin av ferðamannaskipum í 2024 hjá Tórshavnar Havn og og Visit Tórshavn vísir, at gott samstarv millum Tórshavnar havn og Visit Tórshavn er lykilin til eina burðardyggari ferðavinnu.
Tórshavnar havn og Visit Tórshavn hava longu sett í verk fleiri átøk fyri at betra um upplivingina hjá bæði ferðafólki og borgarum í Havn.
Eftirmetingin, nevnd Eftirmeting av ferðamannaskipum 2024, vísir eisini á, at fleiri átøk eru neyðug fyri at røkka málunum um eina burðardyggari ferðavinnu.
Nøkur av átøkunum umfata, at ábyrgdarbýtið millum Tórshavnar havn og Visit Tórshavn eigur at verða nágreinað. Strembast skal eftir at áseta, hvussu nógv skip og ferðafólk Havnin kann taka ímóti, og at skipa viðurskiftini á Reyni við serfrøðingatoymi, ið kann vegleiða ferðafólkum.
Í 2024 vitjaðu 46 ferðamannaskip í Havn við íalt 24.458 ferðafólkum, harav flestu vóru amerikanarar og bretar.
Góð samstarvssamskipan hevur ført til eina góða uppliving fyri bæði ferðafólk og borgarar. Við hesum samstarvi, sum eftirmetingin leggur dent á, er grundarlagið lagt fyri at menna ferðavinnuna víðari til gagns fyri øll í Tórshavnar kommunu.
Vónin er, at Tórshavnar havn og Visit Tórshavn halda fram við at arbeiða saman um at tryggja eina burðardyggari og væl skipaða ferðavinnu.
Eftirmetingin staðfestir, at verða nøkur av hesum átøkum sett í verk beinanvegin, kunnu tey hava góða ávirkan á ferðavinnuna í Havn.
Deil á Facebook
