Suðuroyar Sparikassi hevði 4,5 milliónir krónur í avlopi í 2024. Hækkaðar útreiðslur til KT og niðurskrivingar ávirkaðu úrslitið munandi. Í 2023 var úrslitið 6,1 milliónir krónur, sum í stóran mun er merkt av kursvinningi.
– Vit eru nøgd við ársúrslitið í 2024, sigur Søren L. Bruhn, stjóri, í tíðindaskrivi.
– Í 2025 hava vit góðar vónir til realkreditt, og fyri flestu kundar er realkredittfígging besta lánið til bústaðarfígging. Væntaða ársúrslitið fyri 2025 er 4,5 milliónir krónur áðrenn skatt.
Úrslitið áðrenn skatt gjørdist 5,4 milliónir krónur samanborið við 7,4 milliónir krónur í 2023. Rakstrarúrslitið fyri niðurskrivingar var 9,4 milliónir krónur móti 10,8 milliónum krónur árið fyri.
Útlánini hækkaðu úr 599 milliónum krónur í 2023 til 602 milliónir krónur, ein vøkstur upp á 0,5 prosent. Realkredittlánini hækkaðu við 7 prosentum. Innlánini vaksu úr 693 milliónum krónur til 758 milliónir krónur, ein hækking á 9,4 prosent.
Solvensurin var 25 prosent, meðan solvenstørvurin var 10,7 prosent.
Á aðalfundinum 3. mars 2025 vórðu Hans Petur Joensen og Jákup S. Olsen afturvaldir í nevndina. Suðuroyargrunnurin tilnevndi aftur Onnu Borg Dahl sum nevndarlim.
Deil á Facebook
