Svenska stjórnin er kallað saman til ein serligan fund, fyri at umrøða teir mongu skottilburðirnar, ið hava verið í Svøríki seinastu tíðina.
Tað skrivar svenska kringvarpið, SvT.
Sambært einari uppgerð hjá SvT, so eru sjey fólk deyð av skottilburðum seinastu tíggju dagarnar í høvuðsstaðnum, Stokkhólm, og eisini í Uppsala.
Fundurin, sum stjórnin hevur kallað inn til, verður í næstu viku í Ráðnum móti organiseraðum kriminaliteti.
63 fólk deyð í skottbardøgum
Hetta serliga ráðið varð sett á stovn í desember í fjør, og svenski løgmálaráðharrin stendur á odda fyri hesum ráðnum.
– Vit skulu uppraðfesta arbeiðið við at niðurberja tílíkan kriminalitet, sigur svenski løgmálaráðharrin, Gunnar Strömmer frá Moderaterna, við SvT.
Ráðið skal millum annað kjakast um, hvørji átøk skulu setast í verk, so bandar ikki kunnu útvega sær nýggjar limir, sum eru børn og ungdómar, skrivar SvT.
Millum teir føstu limirnar í Ráðnum móti organiseraðum kriminaliteti er ríkispolitiovastin í Svøríki. Fleiri partar eru bjóðaðir við til fundin, ið verður í byrjanin í næstu viku – herímillum umboð fyri útbúgvingarskipanina og svenska sosialstýrið.
Svøríki setti í fjør eitt keðiligt met. Tá doyðu 63 fólk í skottbardøgum kring landið. Árið fyri var talið 45 fólk.
Deil á Facebook
