– Vit leggja fyri ímóti Danmark, sum í sínum fyrsta dysti vann heili 6-2 móti Noreg. So tað verður allarhelst trupult, men vit fara sjálvandi at gera okkara besta.
Tað sigur Fróði Benjaminsen, venjari hjá U17-landsliðnum við dreingjum við heimasíðuna hjá FSF, sum í hesum døgum tekur lut í árligu NM kappingini, ið er í Finnlandi.
Ferðalagið fór av landinum týsdagin, og umvegis Keypmannahavn varð flogið til Helsinki og haðani koyrt í bussi í tríggjar tímar til Lappenratti, har kappingin verður spæld.
– Vit hava vant mikudagin og høvdu eina venjing í gjár, og eg haldi at okkara dreingir eru væl fyri. So nú gleða vit okkum til dystirnar, og koma í gongd við kappingina, sum væntandi kann menna hesar dreingirnar enn meir, sigur Fróði Benjaminsen við heimasíðuna hjá FSF.
Føroyska liðið er í bólki saman við Danmark og Noregi.
Dystirnir verða spældir í dag, 4. august, 6. august, og seinasti dysturin verður leiktur týsdagin 8. august, tá plaseringsdystirnir eru á skránni. Tá skal U17-landsliðið við dreingum møta annaðhvørt Finnlandi, Svøríki ella Ísrael.
Skráin:
4. aug. Føroyar – Danmark
6. aug. Føroyar – Noreg
8. aug. Plaseringsdystur
Kelda: Hans Erik Danielsen/fsf.fo
Deil á Facebook
