Føroyska U19-dreingjalandsliðið í hondbólti endaði European Open í Göteborg við tveimum teprum ósigrum móti Póllandi og Egyptalandi. Kappingin var liður í fyrireikingunum til HM-endaspælið í august.
Fyrri dysturin í dag var móti Póllandi, har okkara dreingir stríddust við at finna rútmuna. Hóast javnleikur 8-8 stutt fyri hálvleik, vóru tað póllendingar sum høvdu neyvleikan og fóru til hálvleiks frammanfyri 11-9.
Í seinna hálvleiki brendu okkara ov nógv og gjørdu fleiri villur. Endaliga úrslitið gjørdist 22-20 til Pólland.
Seinasti dysturin var móti Egyptalandi. Føroyar byrjaðu væl og vóru á odda fyrstu 15 minuttirnar, men mistu takið og fóru til hálvleiks aftanfyri 12-11.
Verjan hekk ikki saman, og egyptar fingu ov nógv pláss. Okkara royndu at minka um munin, men endaðu við at tapa 27-22.
Føroyar endaðu við hesum nummar 7 í European Open var tó fyrst og fremst ein fyrireiking til HM-endaspælið í Egyptalandi í august, tá ið Føroyar skulu spæla móti Týsklandi, Slovenia og Uruguai.
Málskjúttar móti Egyptalandi:
- Jákup Egholm 8 (3)
- Fríði í Innistovu 4
- Haraldur Karlsson 3
- Filip Haldansen 2
- Lýðar í Dímun 2
- Magnus Árason 2
- Jón Midjord 1
Málskjúttar móti Póllandi:
- Lýðar í Dímun 5
- Brandur Hansen 3
- Rúnar Hammer 2
- Jákup Egholm 2 (1)
- Fríði í Innistovu 2
- Magnus Árason 2
- Hanus Gunnarsson 1
- Haraldur Karlsson 1
Føroyski hópurin í European Open:
Málverjar:
- Ingi Johannesen (H71)
- Bjarni Gunnarson Jacobsen (VÍF)
Útileikarar:
- Jón Midjord (H71)
- Filip Haldansen (VÍF)
- Jákup Egholm (H71)
- Hanus Gunnarson (H71)
- Magnus Árason (GOG)
- Helgi Jakob Halldorsson (H71)
- Haraldur Karlsson (H71)
- Jógvan Andreas Lamhauge (H71)
- Lýðar í Dímun (Neistin)
- Rúnar Hammer (BSH)
- Fríði í Innistovu (VÍF)
- Erling Erlendsson (Kyndil)
- Brandur Hansen (VÍF)
- Pauli Rasmussen (StÍF)
Deil á Facebook
