Iran vann dystin 29-27. Hálvleiksstøðan var annars 13-9 til Føroyar.
Hóast føroyska liðið var frammanfyri 17-11 tíðliga í seinna hálvleiki, máttu føroysku U19-menninir til endans lúta fyri einum iranskum liðið, sum ongantíð gav upp.
Iran vann seg spakuliga inn í dystin og samstundis steðgaði føroyska álopsspælið upp. Yvirtalsspælið hepnaðist ikki nóg væl, og føroysku spælararnir vóru heldur ikki nóg kaldir, tá møguleikarnir komu í seinna hálvleiki.
Besta álopsvápnið, Óli Mittún, mátti út við krampa, tá fimm minuttir restaði í av dystinum og mátti hann, sambært hondbóltsreglunum, harvið sita úti í trý álop, meðan hann fekk viðgerð uttanfyri vøllin, og tað merktist aftur inni á vøllinum.
Hóast dysturin var sera tættur seinastu løtuna, har tað kundi koppað báðar vegir, so var tað Iran sum veruliga setti seg á dystin seinastu løtuna av dystinum, so at endaliga úrslitið gjørdist 29-27.
Málskjúttar hjá Føroyum vóru:
Óli Mittún 9 (7)
Ísak Vedelsbøl 5
Óla Jákup Gaard Olsen 4
Niklas Gaard 4
Rókur Ziskason 2
Jákup Egholm 2
Búi Poulsen 1
Føroyar møta Svøríki leygardagin klokkan 18, og nú skulu Føroyar vinna dystin fyri at koma víðari til topp 16.
Dysturin kann stroymast á Youtube-rásini hjá IHF, sum eitur IHF Competitions.
