Víkingur missir enn ein stuðulsspælara

Víkingur sigur farvæl við enn ein lyklaspælara.

Bergur Gregersen váttar fyri FM1, at hann fyribils gevst at spæla fótbólt, tí hann hevur fingið ein kjans við Akrabergi, sum væntandi landar í Fuglafirði hóskvøldið. Og tá Akraberg fer nýggjan túr, verður Bergur Gregersen við, nú hann hevur fingið kjans við verksmiðjutrolaranum úr Fuglafirði.

– Hetta var ein møguleiki, sum eg ikki kundi siga nei til. Hetta hevur ikki verið ein løtt avgerð, men hetta er nakað, eg havi hugsað um nú í eina tíð, sigur Bergur Gregersen.

Bergur Gregersen, sum í november í fjør annars longdi sín sáttmála við Víkingi við tveimum árum, hevur spælt í miðverjuni í Víkingi, eftir at Gunnar Vatnhamar bleiv seldur til Íslands, men hevur fyri tað mesta spælt á vinstra bakki hjá teimum ljósabláu úr Eysturkommunu.

Venjarin hjá Víkingi, Jóhan Petur Poulsen, sigur í stuttari viðmerking, at hetta er ein smeitur fyri felagið, men at Víkingur ikki fer út at finna ein avloysara fyri Berg.

– Vit fara ikki út at finna ein avloysara. Eg trúgvi upp á teir ungu her í felagnum. Vit hava ein stóran hóp av ungum spælarum her í Víkingi, so tað verður ein av okkara lokalu, sum fer at fáa møguleikan, sigur Víkinga-venjarin við FM1.

Hetta er fjórði lyklaspælarin, sum Víkingur missir í ár. Frammanundan eru Bárður J. Hansen, Noah Mneney og Gunnar Vatnhamar givnir ella farnir úr felagnum.

Víkingur er í løtuni á fjórða plássi í Betri Deildini, men hevur spælt ein dyst meira enn 07 Vestur, ið er á fimta plássi. Tí kann roknast við, at tað stríðið um seinasta evropeiska atgongumerkið fer at standa ímillum Víking og 07 Vestur í ár, og har eru fortreytirnar nú vorðnar verri hjá Víkingi, nú felagið úr Eysturkommunu missir enn ein stuðulsspælara.