Tænastuskipið Vermland er júst endurnýggjað og skrásett í tí føroysku altjóða skipaskránni – eitt nýggjari skip er komið inn í flotan fyri eitt eldri.
Virksemið snýr seg fyrst og fremst um at sigla alifóður úr Noreg til Íslands, ein ruta sum reiðaríið í Streymnesi hevur røkt í kvarta øld.
Skipið, fyrrverandi Arklow Cadet, er bygt í Hollandi í 2016 og er beint undir 3.000 bruttotons til støddar, nakað størri enn tað gamla knapt 2.200 BT skipið, sum varð bygt í 2008.
“Nýggi Vermland, sum kemur fyri gamla skipið við sama navni, sum felagið Sp/f Vermland í Streymnesi eigur, er nú skrásettur í FAS,” boðaði Sjóvinnustýrið frá.
Skipið kom til Føroyar ígjár og skal nú á beding áðrenn tað fer í gongd við somu sigling sum undanfarna Vermland rak fyri fóðurframleiðaran Skretting í Noregi, upplýsir Niels Andreas Mortensen, reiðari.
“Vit hava siglt fyri Skretting í 25 ár, eisini við øðrum skipum áðrenn Vermland,” segði reiðarin við FM1. “Farvatnið kann vera ringt til tíðir, men hetta skipið vit nú fingu eigur at bøta um eitt og annað – tað er sjóbetri og lastar meira, og er nýggjari.”
“Vit sigla til Noregs einaferð hvørjar 10-14 dagar og lasta skipið við fóðri,” legði Niels Andreas Mortensen afturat. “Fóðrið verður ført til Íslands har vit sigla til alibrúk kring landið sum eru kundar hjá Skretting og fylla í fóðurflakarnar har. Vit levera um alt Ísland.”
Fóðrið verður lastað umborð á Vermland í 750 kg sekkjum og flutt til alibrúkini har tað síðan verður blást niður í sjálvvirkandi fóðurflakar.
14 fólk sigla við Vermland, býtt yvir tvær vaktir hvør við sjey monnum, sum burturav eru føroyingar, upplýsti reiðarin.
Deil á Facebook
