Leygardagin var onnur vetrarkappingin í renning við Kerjar í Havn. Runnir vóru 9 kilometrar.
Tað serstaka hesaferð var, at tveir danskir eliturennarar vóru við og vunnu kappingarnar hjá monnum og kvinnum.
Hjúnini Karoline Ejby Stengaard og Jacob Ejby Stengaard eru í Føroyum í arbeiðsørindum og fara at búgva her í eitt ár. Tey hava bæði verið runt um danska landsliðið, so tey eru ein veruligur fongur fyri renniumhvørvið í Føroyum. Millum annað venur okkara fremsti rennari, Rógvi Kárason, saman við teimum.
Jacob Ejby Stengaard vann kappingina hjá monnum við tíðini 33 minuttir og 5,5 sekund. Næstur um málstrikuna var Rógvi Kárason við tíðini 35 minuttir og 4,5 sekund, og nummar trý var Neli Heldarskarð við tíðini 35 minuttir og 21,7 sekund. Allir tríggir renna fyri havnarfelagið Bragdið.
Hjá kvinnum vann Karoline Ejby Stengaard úr Bragdi við tíðini 39 minuttir og 0,5 sekund. Lydia í Lambanum úr Roysni var nummar tvey við tíðini 47 minuttir og 58,4 sekund. Nummar trý var Ann-Mari av Skarði úr Bragdi við tíðini 49 minuttir og 9,9 sekund.
Hesi vunnu ymisku aldursbólkarnar:
| Kvinnur | Karoline Ejby Stengaard | 39:00.5 |
| Kvinnuunglingar (2004-2008) | Teresa Jansdóttir Í Lambanum | 1:02:11.0 |
| Kvinnur veteranar (1970-1979) | Lydia í Lambanum | 47:58.4 |
| Kvinnur superveteranar (1960-1969) | Óluva Zachariasen | 53:30.0 |
| Kvinnur ultraveteranar (f.1959 ella fyrr) | Sunneva Jensen | 1:18:35.7 |
| Menn | Jacob Ejby Stengaard | 33:05.5 |
| Mansunglar (2004-2008) | Torbjørn Hentze | 37:40.2 |
| Menn veteranar (1970-1979) | Sigurd av Reyni | 38:41.6 |
| Menn superveteranar (1960-1969) | Hallur Holm | 39:35.4 |
| Menn ultraveteranar (f.1959 ella fyrr) | Josvein Herup Olsen | 48:47.0 |
Deil á Facebook
